伊巴謙莫域受傷無緣倒戈

猪拉多纳

13/09/2011

ＡＣ今晚出訪魯營，陣內中場雲邦美與前鋒伊巴謙莫域均是倒戈，不過伊巴謙莫域因為操練受傷今場將會缺陣，但雲邦美素來與巴塞中場恩尼斯達唔啱，舊年世盃就曾經將小白踢到飛起。

雲邦美小白仇人見面

由於雲邦美06年效力巴塞期間，同小白經常要爭位出場，大家係競爭對手冇乜幾句，到舊年世盃荷蘭對西班牙爭冠軍，雲邦美係荷蘭防中，多次侵犯表現活躍嘅恩尼斯達，冇打交都好彩。小白對於雲邦美關係有以下評語：「又唔可以話好差嘅，但肯定唔係好囉。」


另一方面，巴塞隆拿超級新星堤亞高艾簡達拿，原來本身喺意大利出世，父親更曾効力過萊切及費倫天拿，佢從父親口中得知ＡＣ米蘭特別擅打歐聯，叫巴塞隊友千萬唔好大意。