昆士柏啃唔落「喜鵲」

猪拉多纳

12/09/2011
文： 亨格比利

祖爾巴頓今晚喺英超獨腳戲就有機會報仇，為新東家昆士柏流浪倒戈鬥紐卡素。之不過呢位「壞孩子」嘅如意算盤好難打得響，事關昆士柏新兵太多磨合需時，想捉「喜鵲」唔係咁易。（有線200及300、廣東體育周二凌晨3:00直播）




祖爾巴頓今夏嘈到拆天，炮轟紐卡素主席艾殊利不思進取，唔明點解佢唔用賣走安祖卡路爾筆錢嚟增兵，仲批死「喜鵲」冇前途，咁沙膽插主席，最終當然冇得留低啦！以3支升班隊伍嚟講，昆士柏都算積極嘞，除咗簽入祖爾巴頓之外，仲一口氣羅致後衞安頓費迪南、楊格、阿曼特查奧爾、中場胡禮菲臘斯同賓捷安，戰鬥力即時「升呢」。


「喜鵲」夏柏艾美奧比復操


部分新兵都係舊會棄將，戾氣咁重當然想喺新會踢好波出番啖氣，不過呢班友初嚟埗到，一時三刻點可能咁快融入球隊吖？況且昆士柏新季分別吞過愛華頓4蛋同韋根兩蛋，咁嘅表現真係唔合格。




反觀紐卡素新季不知幾勇猛，開咧3戰錄2勝1和僅失1球，創造自95/96球季以嚟最佳開局，個勢咁好使乜驚昆士柏呀？更重要係門將夏柏、中場古費利同前鋒艾美奧比已經復操，領隊柏杜大把人使，造訪仲未喺英超企穩陣腳嘅昆士柏坐和望贏。