昆士柏打鵲大陣仗

猪拉多纳

12/09/2011
文： 樂比堅尼

周二凌晨英超獨腳戲，昆士柏流浪主場對紐卡素。升班球隊昆士柏流浪早前獲馬來西亞商人費爾南德斯注資後，立即喺轉會市場關閉前大手掃貨，羅致咗祖爾巴頓、胡禮菲臘斯、楊格、安頓費迪南及阿曼特查奧爾等好手，令戰鬥力即時「升呢」，主場力足收拾「喜鵲」，入球大揀先，QPR讓平半捧上盤！（有線200及300台周二凌晨3時直播）




昆士柏季初表現冇令人留下深刻印象，不過新班主入主後，明顯積極咗好多，幾位新加盟嘅球員，好似胡禮菲臘斯同祖爾巴頓都係幫到隊波嘅好貨色，配合埋泰拉拔、沙恩戴利等升班功臣，陣容已經相當完整。




昆士柏今場最大優勢，相信係佢哋主場洛夫度斯路球場，呢個係英超最細嘅球場，但狹窄嘅空間，反而造成無形嘅壓迫感，好多球隊來到呢個球場都好唔慣，而胡禮菲臘斯加盟後，可以同泰拉拔雙翼齊飛，加埋兩邊看台嘅吶喊助威，「喜鵲」插翼難飛！


紐卡素箭頭飄忽


紐卡素上季賣走安祖卡路爾之後，好多球迷寄望佢哋會大事增兵，但領隊柏杜以不變應萬變，以原班人馬為主力。樂比仔對此舉有所保留，畢竟紐卡素最大問題係攻力不足，前線貝斯同艾美奧比畀人嘅感覺都係唔多穩陣，雖然頭幾場防線表現唔錯，不過受到嘅考驗根本唔多，今場對住飢渴感十足嘅昆士柏流浪，後防未必頂得住，相信會有好多入波鏡頭，入球大及上盤都可取。