不來梅打吡戰踩多腳

猪拉多纳

10/09/2011
文： 蘇斯黑柴

今晚德甲尾場上演北部打吡，雲達不來梅主場迎戰漢堡，目前排包尾嘅漢堡頭頭碰着黑，經過國際賽休戰期後，球隊狀況仲愈嚟愈差，今晚作客面對聯賽兩連勝弗到爆嘅不來梅唔夠砌，黑柴推介不來梅「讓球主勝」。（有線61及201台周日凌晨零時30分直播）




漢堡今夏大失血，放走晒各線嘅領袖級球員，搵嚟一批未成熟嘅車路士小將，根本接唔到班，至今四戰只得一分排包尾，防線失14球，水準仲差過好多德乙球隊，基於財困，佢哋喺轉會窗關閉前仲繼續失血，放走埋艾利亞、賓哈迪拉同迪美，只買入凱沙羅頓中場伊利斯域，實力進一步削弱。


漢堡中前場大將缺陣


經過國際賽休戰，漢堡衰運接踵而來，首席射手孫弘民上輪聯賽受重創，今晚要休戰，新加盟嘅伊利斯域原本係凱沙羅頓中場靈魂，球隊對佢寄望甚殷，可惜加盟球隊前一仗攞咗紅牌，仲要被重判停賽四場，即係成個九月份都唔使旨意佢幫到手。




不來梅今季四戰三勝，唯一敗仗作客對利華古遜亦踢得唔差，雖然啱啱將後防大將梅迪薩卡賣畀阿仙奴，但新加盟嘅中堅安達斯禾夫傷愈復出，人腳仍然完整，今晚主場踢打吡戰當然肉緊，趁漢堡病踩多腳。