大阪櫻花冇鬥心 浦和紅鑽受讓要跟

猪拉多纳

28/08/2011
文： 走肖

運氣同決心，有時候可以改變好多嘢，大阪櫻花今晚喺日職主場對浦和紅鑽，未開波先輸運，唔好彩有南韓國腳金甫炅傷埋，返咗去祖家醫腳，相反紅鑽有翼鋒原口元氣首次入選日本國家隊，而且專登將金髮染番黑，代表佢堅決上位嘅意志，受讓平半值得吼實。（now633台周日下午5:00直播）




講得好聽，櫻花高層唔會阻人發達，香川真司、阿祖安奴費拉拿、洛迪高賓柏奧同乾貴士要求轉會，佢哋都冇拒絕，但難聽講句，就可以話櫻花冇大志，唔肯諗辦法留住陣中主力。依家好啦，原本櫻花已經有小松壘同路爾斯馬天尼斯養傷，金甫炅上場又開始因傷避戰，雖然上場波受傷嘅清武弘嗣，據講傷勢唔算嚴重可以繼續踢，但佢臨場表現好可能打折扣，唔夠人用肯定蝕底。


原口元氣染黑髮明志


另一方面，紅鑽今場有柏木陽介同山口直輝停賽，同樣中場實力大減，但唔可以否認，近期紅鑽開始翻生，連盃賽近13場有6勝5和2負，而且超新星原口元氣，終於首次獲得日本國家隊徵召，由於上位機會難得，佢索性將個金毛頭染番黑，話要畀個好印象國家隊教頭沙哲朗尼，擺到明希望以後可以繼續入選，試問呢場佢點會唔搏命，話畀沙哲朗尼知佢有料先？信佢就博下盤。