皇馬作客薩拉大件事

猪拉多纳

28/08/2011
文： 郭球奇

銀河艦隊啟航！皇馬今晚作客薩拉戈薩，入球大抵玩，皇馬鋒力有幾勁唔使多講，但卡斯拿斯今戰或坐冷板影響防守，睇埋兩軍對賽例開大，今晚都好難例外！（now632及660台周一凌晨2:00直播）


薩拉戈薩Vs皇家馬德里


皇馬今夏大事增兵，可惜早前喺西超盃對巴塞都係唔夠揪，唯一值得開心嘅係兩回合都入2球。其實皇馬喺熱身賽表現唔錯，特別係C朗，難得呢位球星日前喺歐洲最佳球員選舉輸畀美斯後黑晒口面，證明佢好有鬥心，話唔定今晚入多幾球當發洩。


寸王嬲卡斯拿斯向巴塞道歉


鋒力夠堅，可惜防守唔掂！西班牙《馬卡報》爆料，話莫連奴勁不滿班守將，「寸王」近日仲同門將卡斯拿斯反面，原因係「聖卡」喺西超盃後私底下向巴塞球員道歉，結果日前呢位門神喺對加拉塔沙雷一戰被雪藏，今晚好可能仲未解凍。




薩拉戈薩上季中喺艾古爾接手後回勇，今夏仲借得些路迪中場伊法恩祖亞雷斯同韋斯咸翼鋒巴里拉，有條件入波。睇番兩軍近5次對賽都開大，與其捧皇馬熱W，球奇認為1.48倍入球大仲抵玩！