無敵主場16連勝 紅魔新星打爆廠

猪拉多纳

28/08/2011
文： 力奇

連主場對住利物浦都吞2蛋，今晚阿仙奴喺英超仲要作客喺奧脫福惡到爆嘅曼聯，力奇真係搵唔到任何理由再撐佢哋，特別係兵工廠今仗鬧兵荒，有多達8名主力唔踢得，想唔畀紅魔鬼拎嚟祭旗都幾難。今場我捧2.3倍「讓球主勝」，博曼聯大捷。（有線200、300及廣東體育周日晚11:00直播）


兵工廠8件唔踢得


兵工廠近排先後賣出法比加斯同拿斯尼，雖然話一了百了樂得耳根清靜，不過中場實力大減，自然唔係一時三刻可以解決。最慘係今仗佢哋中場線仲有桑治、費林邦兩個防中停賽，指揮官韋舒亞又因傷缺陣，攻守都大受影響。除此之外，坐波監嘅仲有前鋒謝雲奴，中場戴亞比、後衞哥斯尼、基蘭基比斯同史基拿斯又都係有傷在身唔踢得，殘陣出擊，點捧得落手？




曼聯星級後備爭住踢




曼聯呢邊，媲美「92黃金一代」嘅年輕兵團今季終於誕生，成班小將落場好波兼好鬥志，威力真係唔講得笑。就算話擔心年輕球員表現飄忽，費Sir後備席仲有傑斯、貝碧托夫、拿尼同查維亞靴南迪斯呢啲星級球員，等緊機會落場搏殺，個個都有本事獨力扭轉戰局，都咪話唔得人驚呀！




紅魔鬼仲有樣強勁武器，就係佢哋個奧脫福主場。佢哋上季聯賽主場19戰就得18勝1和，連同各大賽事計，近16場主場戰全勝，近7次主場鬥兵工廠又錄得6勝1和，主場勁爆，贏少球都難啦！


紅魔主場交手佔上風


‧近7次主場對阿仙奴得6勝1和。

‧韋碧克近5個英超入波均來自頭槌。