紅鑽三斤釘摧櫻花

猪拉多纳

28/08/2011
文： 蘇豪

伊度奧離開國際米蘭加盟俄超暴發戶安治，即被標籤為見錢開眼之徒。職業球員生涯匆匆十數載，連年激戰過後隨時五勞七傷，難道搵多個錢傍身都有罪？球壇有人為榮譽而奮戰，亦有人好似特首只求做好份工，人哋用自己雙腳求財咋喎，冇偷冇搶，咁都唔得？




有死忠粉絲指球員當初加盟時表明效忠球會，但最終背叛球會賤格，大佬呀，古來球員加盟新球會例必戴上假面具，chok晒樣扮乖仔又忠誠，但求博得老細、領隊及球迷等米飯班主支持，以確保仕途順利，情況有如情侶拍拖蜜月期，例必向對方展示最好一面，此乃人之常情，唔通一行埋就攤晒出嚟畀你知，我冇錢冇面又冇料咩！




做人要現實啲，畀着你係伊度奧，對方開出天價人工挖角，真係可以對抗引誘不侍二主？況且佢又唔係馬甸尼、傑斯同托迪，唔使托住個貞節牌坊做球會生招牌，何不走去俄羅斯走番轉搵盧布，就算去到畀人種族歧視笑係馬騮，大可用花綠綠銀紙鋪平心中創傷。人望高處，只要服侍得老細妥妥貼貼，富貴榮華唾手可得。


近九作客僅1敗


是日日職名牌球隊浦和紅鑽作客大阪櫻花，紅鑽係日職過氣名牌，對手櫻花又何嘗唔係殘花敗柳？大家同是天涯淪落人，今次衰鬥衰，紅鑽勝在爛船仲有三斤釘，近九次作客只輸一場，受讓要「讓球客勝」。




（now 633周日下午5時直播）