巴塞捧歐超盃3年12冠

猪拉多纳

28/08/2011


香港時間周六凌晨歐洲超級盃，巴塞隆拿憑美斯及新將法比加斯入球，以二比○擊敗波圖，再增添多一項錦標，三年內連奪十二個冠軍，沙維更以十八項冠軍成為巴塞史上捧盃最多球員！




由於佩奧爾受傷，沙維今仗以隊長身份帶領巴塞出場。巴塞今仗控制戰局，上半場三十九分鐘由美斯先開紀錄，到比賽末段，巴塞再由法比加斯建功，以二比○擊敗對手，今仗波圖先後有兩名球員被逐，最後僅以九人應戰。而喺阿仙奴多年來食白果嘅法比加斯，一嚟到巴塞就連捧兩盃，都算好腳頭！此外，當選MVP嘅美斯，喺球會級六大賽事兼國際賽三大賽全部有「士哥」，成就前無古人，新世代球王捨佢其誰？


沙維寸爆莫帥


今仗賽後出現小插曲，沙維捧盃慶祝時，諷刺死敵莫連奴執教嘅皇家馬德里冇盃捧，但教練哥迪奧拿盡顯風度，叫沙維唔好搞搞震挑釁對手，贏波贏埋風度，真係抵佢教巴塞咁成功！