熱刺主場受讓偷笑

猪拉多纳

28/08/2011
文： 樂比堅尼

今晚英超另一場重頭戲，熱刺主場對曼城。樂比仔一睇個盤口真係嚇一跳，曼城作客讓平半，冇嘢吖嘛？雖然曼城開季二連勝，但對手僅屬保頓及史雲斯之流，計樂比仔話熱刺讓波就差唔多，下盤千祈咪走雞！




（有線200及300台周日晚8時30分直播）




曼城季初聲勢強勁，簽完阿古路之後，又多咗個拿斯尼，但足球唔係「1+1=2」嘅遊戲，正所謂多個香爐多隻鬼，依家曼城人就多喇，但落到場嘅始終係十一個，咁多球星加盟，只會令內部不和問題進一步浮現，默契又要重新磨合，可謂百害而無一利。


曼城星多是非仲多


事實上，曼城太多球星屈就踢後備，好多球員已對領隊文仙尼表達不滿，率先開火嘅當然係麻煩友巴洛迪利，而泰維斯嘅前途問題，一直為球隊帶來負面影響，據英國傳媒透露，拿斯尼今仗有機會正選登場，咁請問邊個讓個正選位畀佢踢先，其他人又服唔服呢？




熱刺上輪聯賽雖然慘吞曼聯三蛋，但曼聯咁弗，熱刺作客輸波係非戰之罪，熱刺今季雖然冇乜新球員加盟，但加里夫巴利、雲達華治等主力仍在陣中，單計攻擊力絕對唔喺曼城之下。




睇番兩軍近年對賽，熱刺絕對係不落下風，近六次碰頭熱刺取得四勝一和一負佳績，樂比仔唔覺得今季嘅曼城，實力會較過去一、兩季好，只能夠話兵源更充裕，所以曼城今仗讓平半絕對唔合理，樂比仔寧撐下盤。