利華硬淨唔赦多蒙特

猪拉多纳

27/08/2011
文： Wendy

前晚做完「球彩俱樂部」消夜都唔食住，要睇埋歐聯分組抽籤先。四隊英超球隊似乎以我愛隊曼聯支籤最靚喎！德甲三雄多蒙特、利華古遜同埋拜仁慕尼黑，以利華嗰組最惡踢，同組有車路士同華倫西亞兩隊硬嘢，一個唔小心就會降格踢歐霸喇！


多蒙特折箭把握力減


今晚隊德甲「利記」會喺主場迎戰衞冕嘅多蒙特，呢場可以話係本周德甲最強戲碼。多蒙特作客嚟到要讓波咁惡？呢場波若果係主隊讓或者平手盤，一定全世界都買晒多蒙特啦！我都一樣。但個盤咁惡要讓返轉頭，利華有主場之利起碼頂個和都唔過分吖，話晒上季都係亞軍喎！好，我一於唔信個盤，要利華古遜「讓球主勝」。（有線61及201台周日凌晨零時30分直播）




多蒙特今季無疑係咁多隊德甲球隊中最對辦，紐尼沙軒離隊嘅影響冇想像中咁大，香川真司亦重拾上季重傷前嘅狀態，但多蒙特之前都有作客輸過畀賀芬咸，嗰場小妹亦身受其害。其實今季季初佢哋仲欠箭頭巴里奧斯，今場佢繼續缺陣，位置由羅拔利雲度夫斯基頂上，把握力大減。




利華古遜今季由前弗賴堡教頭杜特執教，踢法實際好多。淨係睇呢位教頭將弗賴堡由乙組帶上甲組成績有升冇跌，就知幾有斤両啦！今季加盟嘅舒賀爾尼場場有正選，把握力唔會差過對家嘅馬里奧葛斯好多，兩個都有入波本錢。利華除咗龍門艾達同基爾化受傷，其餘位置人腳都充裕，臨危受命嘅年輕門將賓特尼奴，上兩場聯賽踢正選都交足貨，主場受讓點可以走寶！




Wendy推介：利華古遜 讓球主勝




熱愛舞蹈的Wendy，2004年歐國盃Euro Babe變身成為有線球彩台節目主持，當初對足球猶如混沌初開，依家已滾瓜爛熟，最愛暢談波經。