紐卡素爭氣索番鋪

猪拉多纳

25/08/2011
文： 樂比堅尼

香港時間周三凌晨上演嘅英格蘭聯賽盃第二圈，三支英超升班球隊諾域治、昆士柏流浪同史雲斯全部「如願」輸波，昆士柏領隊禾諾克更講風涼話，話英聯盃出局可專心踢英超，簡直離晒大譜。但實力較強嘅維拉、西布朗及狼隊順利晉級，相信今晚最遲出場嘅紐卡素，作客對甲組仔斯肯索普應可輕鬆過關！（now 638周五凌晨2時45分直播）




周三凌晨共有七支英超球隊登場，結果只得三隊晉級，三支升班球隊全部落敗，而且輸得相當難睇，昆士柏主場以○比二不敵甲組嘅羅奇代爾，而諾域治主場更慘吞甲組仔米爾頓凱恩斯四蛋。史雲斯仲衰，作客輸畀乙組嘅梳士貝利一比三，至於「黑貓」新特蘭亦難逃出局命運，加時以○比一不敵英冠人氣球隊白禮頓，領隊布魯士喪插前鋒唔生性，演出令人失望！




不過，另外三支英超球隊狼隊、西布朗及阿士東維拉卻贏得相當輕鬆，聯賽二連勝嘅狼隊，作客以四比○大破諾咸頓，而西布朗亦以四比一擊敗般尼茅夫，所以大家唔使擔心今晚嘅紐卡素贏唔到，因為英超中型班球隊，應付低組別球隊仍綽綽有餘，就算收起幾件主力都絕對夠殺！


對斯肯索普全力爭勝


事實上，紐卡素領隊柏杜已事先張揚，話聯賽盃唔會掉以輕心，因為球隊個頭開得咁靚，一定唔會打窒自己個勢，新隊長高洛仙尼近期表現大獲好評，佢話有信心隨着聯賽企穩陣腳外，盃賽亦會畀心機，對住低兩班嘅斯肯索普，客W有1.7倍其實非常吸引！