羅比堅尼攞頭彩捧銀河

猪拉多纳

20/08/2011
文： 力奇

咩嘢叫如虎添翼？睇吓美職一枝獨秀嘅洛杉磯銀河咪知囉！本來已經贏盡實力，家陣仲得到愛爾蘭球星羅比堅尼加盟，拍住碧咸搵食，絕對超晒班。銀河聽朝主場迎戰弱旅聖荷西地震，有羅比仔首演爭攞彩，贏少球都唔收貨，一於捧「讓主」啦！（開賽時間：周日早上10:30）




銀河家陣喺美職以25戰得48分高踞榜首位置，佢哋近5場有4勝1負，周中啱啱踢完中冠盃又以2:0擊敗洪都拉斯嘅摩塔格，狀態Fit到漏。原本有美國首席球星當路雲拍住碧咸，已經係贏波保證，家陣仲整件踢過國米同熱刺嘅羅比堅尼加盟，真係仲有邊隊擋得佢哋住？


地震頹爆6戰不勝


唔係講笑，羅比仔嘅把握力要撕破美職球隊防線真係話咁易，最緊要係佢依家只係得31歲，仲喺當打之年，相比起當年碧咸投效銀河仲後生，畀到球隊嘅貢獻勢必更多。




反觀地震近期頹到爆，近6戰得3和3負，家陣排緊14位，實力肯定差一截。就算話佢哋都簽入咗厄瓜多爾前鋒艾蒙度蘇拿，睇怕都唔寄望得太多。仲有呀，佢哋今仗仲有中場森哥連停賽，陣容受損，想偷雞都冇乜可能。