東北打吡難分高下

猪拉多纳

20/08/2011
文： 山度士

今晚英超好戲連場，除阿仙奴鬥利物浦之外，再早開波有場東北打吡新特蘭鬥紐卡素，兩軍實力不相伯仲，而且首仗都有好表現，加埋打吡戰元素，預料今仗戰情會非常接近，和波機會高。




（有線201及301台周六晚7時直播）




新特蘭今季買咗唔少新球員，其中布朗、施巴斯坦拿臣首仗對利物浦都已證明物有所值，和波搶得一分絕對合理。紐卡素上仗表現亦唔錯，主場守和阿仙奴，祖爾巴頓搞到謝雲奴被逐雖有做戲之嫌，但呢點都係比賽一部分，要怪就怪謝雲奴初來英超輸經驗，下次唔好中計。


3.2倍和博得過


講番正題，計實力今場雙方真係好接近，度士認為大家都有機會打入前十名，而且打吡戰關乎名譽及面子，球員落場一定搏到盡。睇番近六次對賽，原來紐卡素只輸過一次畀對手，受讓固然值得捧場，如果單計作客，紐卡素近三次作客光明球場有兩次踢成一比一，想求賠率可捧3.2倍和局或小敲「1：1」波膽。