巴西剝「牙」爭入世青盃4強

猪拉多纳

14/08/2011
文： 自由恒

相比起之前嘅幾項國際大賽，世青盃相對較為強弱懸殊，小組3戰全勝嘅都有3隊咁多，但由於小組第3名都有機會殺入次圈，搞到連續3場0:0嘅英格蘭竟然都可以喺淘汰賽出現，不過經過16強比賽之後，所有掹車邊球隊都已經出局，依家8強大戰都係精英對精英。


西班牙未夠說服力


聽朝上演嘅巴西對西班牙，直頭就係一場提早上演嘅決賽一樣，講星味，當然以西班牙佔優，但查實佢哋能夠殺到入8強，都只係多得分組形勢有利，小組3戰全勝皆因對手太弱，一去到16強要鬥到互射12碼先搞得掂南韓，實力似乎非想像中咁勁。




反觀巴西就愈踢愈好，首戰打和埃及之後，近3場都係做派蛋大使，實力明顯超班，話晒佢哋都係南美U20盟主，近年世青盃都係美洲球隊惡晒，歐洲隊多數陪跑，信往績點都係信森巴兵團。（開賽時間：周一早上7:00）