|
14/08/2011
文: 蘇斯黑柴
德甲第二輪壓軸戲利華古遜主場迎戰雲達不來梅,利華喺德國盃同聯賽接連遭遇滑鐵盧,今晚面對最擅長喺拜亞球場作戰嘅雲達不來梅仲要讓波,黑柴捧2倍「讓球客勝」。(有線61及201台周日晚11時30分直播)
利華古遜今季起步脫腳,德國盃領先三球下畀乙組仔特雷斯登逼和,踢到加時仲輸埋出局,跟住喺聯賽首仗面對實力嚴重下滑嘅緬恩斯,亦全場捱打淨吞兩蛋。利華今季頭頭碰着黑,季前先後失去名帥軒歷基斯(轉投拜仁慕尼黑)同上季最佳球員維達爾(轉投祖雲達斯),中場大將巴尼達受傷要長抖,陣中最大牌嘅波歷克又因為態沉同態度差被貶為後備,整體戰鬥力大幅削弱。
不來梅作客拜亞特醒
不過,最攞利華命嘅係鬧門將荒,國腳門神艾達啱啱做完手術有排抖,新加盟嘅前杜伊斯堡門將耶度喺德國盃慘失四球,即時被打入冷宮,跟住年輕門將基爾化喺聯賽首仗對緬恩斯先「大撻Q」送禮,繼而踢到腦震盪短暫失憶,今仗肯定唔踢得,利華三個龍門都唔掂,喺今仗賽前四日至借得史特加19歲門將賓特尼奴頂檔,呢位小將從未踢過德甲,過去只曾為史特加青年隊喺德丙上陣,今晚臨時拉伕好牙煙。
雲達不來梅今季針對性增兵,新加盟嘅柏柏斯達夫普路斯、盧卡斯舒密斯同安達斯禾夫大大改善過去不穩防線,上仗兩球輕取凱沙羅頓力保不失,全隊狀態甚佳。何況不來梅近6次作客對利華古遜取得2勝4和不敗佳績,足見拜亞球場係佢哋福地,今仗力足全身而退。
|
|