|
14/08/2011
巴塞隆拿新援阿歷斯山齊士(A山),好有機會喺今仗西超盃上陣。因為腳法純熟兼速度高,踢法與C朗頗為相似,故此阿歷斯効力意甲烏甸尼斯就被譽為「智利C朗」。今場正牌C朗會同「智利C朗」同場較技!
現年廿二歲嘅阿歷斯山齊士,○六年展開職業球員生涯,効力過高路高路及河床等南美球隊,及後喺烏甸尼斯大放光芒,唔少球迷都話佢勁過兩位智利前輩森莫蘭奴及沙拉斯。
據西班牙媒體估計,巴塞教練哥迪奧拿或會將阿歷斯山齊士安排喺左路,與美斯及韋拿合作攻堅。哥迪奧拿讚阿歷斯山齊士聽教聽話,係一個好聰明嘅球員,相信佢好快就會融入巴塞。
|
|