|
13/08/2011
文: 吉拿甸奴
現實同遊戲世界始終有分別,唔係話憎人富貴針對巴黎聖日耳門,而係佢哋得到卡塔爾大水喉射住後,瘋狂買人點都要時間培養默契,中場查杜美更爆料,話現時聖日耳門默契唔夠,部分新隊友狀態未足,今晚雷恩喺法甲主場對聖日耳門,平手追得過。(now634台周日凌晨1:00直播)
查杜美爆新兵冇狀態
今季雷恩最大手筆收購係以400萬歐元買入南錫中場菲列特,錢使得唔多,但佢同雷恩食胡人物域陀蒙坦奴同中場拉沙保卡尼,開咧戰作客贏迪安5:1分別有進帳,呢啲咪叫入啱貨,配合到隊波囉,燒錢狂買人即時攞到冠軍,唔係唔得,少啲啫,同埋多數玩電腦、電視遊戲至會出現。
至於聖日耳門,高價掃完羅連安特前鋒加美路、羅馬前鋒文尼斯、祖雲達斯中場施素高同巴勒莫中場柏斯托尼仲未夠喉,話要買埋曼聯射手貝碧托夫至安樂喎,結果?開咧戰主場以0:1慘負羅連安特,中場查杜美似乎睇唔過眼,埋怨部分新隊友狀態差,同舊球員又唔夾,咁快就內訌,點捧得落呀!
|
|