|
11/08/2011
文: 麥馬拿仁
英聯盃第一圈賽事,英甲錫周三「大」戰黑池。黑池領隊荷路維,上屆英聯盃玩輪換出後備敷衍,最終同甲組仔踢成三比三,有迹可尋唔跟呻笨。錫軍有料領隊加利麥臣難得鬥英冠球隊,必遣精兵迎敵,有條件同黑池合演「大」騷!
(now 638周五凌晨2時45分直播)
日前有多場英聯盃上演,有五支英冠球隊作客低組別弱旅,其中四場開大,當中三隊「弱雞」入到波。事實上英格蘭主場球隊極具威力,而英冠波老實講亦唔係好醒,最重要係連佢哋都睇唔起英聯盃,不僅周時派後備應戰,而且爭勝意欲亦唔強,故不時出現大手交易。
荷路維出副選應戰
黑池今季走了查理阿當等主力,一向唔重視英聯盃嘅荷路維,更大條道理以副選出戰;而佢不嬲崇尚進攻,去屆英聯盃第一戰,作客就同米爾頓凱恩斯開出三比三大波膽,今次唔會例外。而前保頓領隊加利麥臣,「踎躉」一年後先搵到錫周三收留,佢受盡凌辱後必希望做單「大嘢」,今次主場出擊唔會揸流攤,雙方快打快下大盤冇走雞。
|
|