|
03/08/2011
文: 法比加輝
世青盃C組賽事,澳洲U20會於明早出戰哥斯達黎加U20。經過首場賽事後,發覺名氣較大嘅澳洲攻力欠佳,上場都係靠死球先能夠逼和厄瓜多爾,今場「-1」博唔過,加輝推介哥斯達黎加「讓球客勝」。
(周四早上9時開賽)
澳洲青訓系統唔多掂
日本及南韓等亞洲國家近年人才輩出,不少新星已經登陸歐洲四大聯賽,但澳洲卻一直畀人青黃不接嘅感覺,到現時為止仍依靠老將如舒華沙及尼爾等打江山,可想而知澳洲嘅青訓系統的確略遜一籌。所以今屆世青盃賽事,加輝亦唔會對呢班「袋鼠仔」有所寄望。
睇番澳洲首場比賽,面對南美兵厄瓜多爾整場捱打,威脅射門寥寥可數,若非完場前射入自由球嘅話,早已三分盡失。雖然哥斯達黎加首場比賽亦表現欠佳,以一比四大敗於西班牙腳下,但「鬥牛幫」係今屆世青大熱,大部分球員已經有西甲經驗,輸波實在不足為奇,反而第一場就遭逢大炒,加輝認為哥軍會知恥近乎勇,今場盡力做好防守避免再逢羞家戰果,所以哥斯達黎加有得受讓,實在捧得過。
|
|