亨利呼籲阿仙奴放法比仔

猪拉多纳

31/07/2011
文： 朱楓

今晚酋長盃上演第二日賽事，東道主阿仙奴尾場迎戰紐約紅牛，計牌面兵工廠肯定秤先，不過阿仙奴尋日狂傳壞消息，先有中場戴亞比重傷長抖，繼而再傳法比仔會喺聽日完成轉會，家陣軍心混亂，今場對住有前冇後、兼有亨利倒戈嘅紅牛絕對有隱憂，朱楓覺得捧入球大會比較穩陣！（now633台周日晚11:20直播）


戴亞比重傷無緣戰紅牛


阿仙奴近排喺熱身賽表現唔錯，未計尋晚對小保加，獲2勝1和。不過兵工廠尋日卻傳出一大籮壞消息，領隊雲格證實中場戴亞比啱啱做完足踝手術，至少要抖10周，最快要到9月先復出。




不過最令「廠迷」擔心，始終係法比加斯嘅轉會問題。尋日雲格自爆已經唔想再纏繞喺呢件事上面，轉過頭《每日體育報》更爆出法比仔願意減薪過檔巴塞，兩會有望喺聽日會面落實交易。連尋晚冇落場嘅亨利都走出嚟講：「阿仙奴唔會冇咗法比仔就唔掂，一間球會永遠大過一個球員。」擺明就呼籲阿仙奴放人。




倒戈嘅亨利今季喺美職勁弗，暫時喺射手榜以11球帶出，弊在紐約紅牛踢法有前冇後，暫時喺美職入37球失30球。雖然早排喺漢堡簽入門將路斯，但呢位德國老牌門將加盟後仍未為紅牛止血，3次上陣勁失6球，今晚對住一向以進攻見稱嘅阿仙奴，都係買大比較划算。