|
31/07/2011
文: 牛奶仔
都柏林超級盃密鑼緊鼓進行,嚟到今晚第二日嘅賽事,有國際米蘭對曼城,連續踢兩日波,兩軍定以車輪戰方式應戰,一於捧陣容鼎盛嘅曼城贏波。(now634及660台、廣東體育周日晚11:30直播)
本來兩軍實力理應旗鼓相當,可惜國際米蘭今次有多達6名南美主力未歸隊,加上中場菲臘比古天奴為巴西出戰世青盃而缺陣,令教練加斯柏連尼可用兵源不多,為咗應付一連兩日嘅比賽,相信今場會繼續起用唔少青年軍同大後備出戰,實力難有保證。而且加斯柏連尼為免班球員太攰,已經下令辛尼迪等幾件南美兵,唔准參加稍後响北京舉行嘅意大利超級盃添,可見佢嘅季前策略係唔想玩殘班人。
文仙尼睇重熱身賽
向來以龐大「軍備」見稱嘅曼城,只有泰維斯同薩巴列達未有歸隊。當然,曼城今場同樣會派唔少副選上陣,但一班後備兵包括有迪斯高、巴洛迪利同胡禮菲臘斯等球星,質素絕對比國米班副選高幾班。
同時,領隊文仙尼非常認真看待今夏每場熱身賽,睇日前巴洛迪利門前玩嘢,即刻被換走就知啦,相信全隊上下都唔敢揸流攤,定必當正式比賽咁踢!
酋長盃及都柏林超級盃賽制
酋長盃及都柏林超級盃都係由4支球隊角逐,每隊會對其中2隊對手,贏波3分,和波1分,同時每攻入1球亦會有1分,得分最高一隊捧盃。
|
|