新帥祖爾歐霸盃省招牌 富咸-3熱食

猪拉多纳

30/06/2011
文： 朱楓

歐洲一線聯賽球會依家全部仲歇緊暑，唯獨富咸就例外，今晚會出戰歐霸盃，喺第1圈外圍賽首回合主場對NSI魯納維克。話晒富咸有新領隊祖爾處子登場，梗要省靚個招牌，對住極品魚腩NSI，就算讓3球，1.7倍「讓球主勝」熱都捧得過！（開賽時間：周五凌晨2:30）




今屆以英格蘭公平競技獎得主身份參戰歐霸盃嘅富咸，雖然早前有領隊曉士辭職，但已立即搵到祖爾頂替。賽前呢位前熱刺教頭話好開心重返英超，好期待今晚帶領新東家打首場正式比賽，仲話會當呢場波係備戰新球季嚟打，睇得出好想爭取佳績。


NSI踢歐洲賽例慘敗


富咸中場謝拉已離隊，中場丹普西同守將沙斯度因為啱啱踢完金盃，今場亦好大機會缺陣，不過睇番歷史，原來富咸喺歐洲賽史上主場從未輸過，至今錄得11勝4和，絕對唔講得笑！




對家NSI魯納維克上季喺法羅群島聯賽取得第3，得以取得今屆歐霸盃參賽資格。不過法羅群島出名係歐洲魚腩，入面聯賽嘅球隊實力有幾多大家心裏有數。事實上，NSI近6次參加歐洲賽，無論踢歐霸盃、歐聯定圖圖盃外圍賽，都係喺第1圈出局，而且鋪鋪都輸鑊甘，今晚作客實力更強嘅富咸，輸4粒當交學費啦！


歐霸盃賽制


外圍賽會分為3圈，每圈均採主客兩回合淘汰制，今輪係外圍賽第1圈首回合，若兩回合總比數賽和，以作客入球較多一方為勝，若作客入球數字相同，則在次回合90分鐘後加時30分鐘，若雙方在加時仍未分高下，則互射12碼分勝負。