犀牛蔚藍有得爆

猪拉多纳

28/06/2011
文： 樂比堅尼

今日有六場美職聯賽盃（美聯盃）十六強賽事開盤，全部都係由美職球隊對乙組球隊，呢項賽事賽制奇奇怪怪，參加嘅球隊又唔太熱心，樂比仔認為有極大爆冷空間，與其捧熱Ｗ，倒不如博冷門好過，精選羅徹斯特犀牛同埋洛杉磯蔚藍畀大家！




未講波之前先講吓賽制，美聯盃係由五個級別嘅聯賽球隊參與，首先每個聯賽嘅球隊會自己互相廝殺，然後再撈埋其他聯賽嘅球隊再踢，以美職為例，上季頭六名可直入十六強，其餘球隊則要踢外圍賽，晉級兩隊先加入第一圈，同其他聯賽嘅球隊交手，換句話說，部分球隊嘅賽程係先強後弱，然後又對番強隊，啲咁獨特嘅賽制，真係美國人至諗到！


甲乙組實力相距不遠


大家可能會奇怪，點解開盤嘅賽事之中，唔係美職就係美乙球隊？因為第二級別聯賽ＮＡＳＬ，其實今季先另起爐灶，而且冇派隊參加美聯盃，而今季踢乙組嘅羅徹斯特犀牛，上季其實係第二組別聯賽冠軍，今季先「降格」踢乙組，所以樂比仔推斷，美乙同美甲球隊嘅水準相差唔遠，美職今圈絕對唔係惡晒。




咁邊隊又最有潛力爆冷？首選係羅徹斯特犀牛，正所謂猛虎不及地頭蟲，犀牛今季聯賽主場不敗，今仗主場對攻力疲弱、聯賽僅贏過兩場嘅火燄，絕對有條件贏埋，其實火燄晉級過程之中，都派好多後備落場，睇怕今場都會收起部分主力。


洛城打吡撐銀河對家


另一場係洛杉磯打吡，洛杉磯蔚藍陣中有唔少球員來自銀河青年軍，今仗倒戈肯定分外落力，加上洛杉磯銀河主將當路雲剛踢完美洲金盃，預計都會畀佢同老將碧咸抖多陣，半力出擊隨時畀蔚藍偷雞成功！