波場大亨：赫根射手着火再搶W

港陌

21/06/2011
文： 亨格比利

今晚有場瑞超獨腳戲，由赫根主場恭候咸史達斯。赫根剛啱贏咗鑊勁，一洗連續4場失分嘅頹風，今仗對住包艇嘅咸史達斯有力乘勝追擊，一於要2.25倍「讓球主勝」。（開賽時間：周三凌晨1:00）


赫根今季繼續靠瑞典前鋒拿尼治食胡，呢位27歲球員迄今已經有11球進帳，上仗更加大演帽子戲法協助赫根大炒特利堡4:1添。呢支哥德堡市球隊除咗後衞伊美華斯唐因膝傷要抖3周之外，其餘主力都可以披甲，人腳都幾完整。

咸史達斯救兵未到

對家咸史達斯家陣包艇，12輪聯賽過後只係入得7球，會方都知班波鋒力唔掂，所以決定搵姊妹球會愛斯賓奴救亡，簽番幾件西班牙仔補充實力，弊在瑞超轉會窗8月1日先重開，簽得嚟都蚊瞓啦！


亨格比利睇番賽後報告，知道咸史達斯近兩仗保持不失，都係全靠門將卡爾祖翰莊臣上晒身，不過赫根係瑞超「入球王」，一對箭頭拿尼治同馬干迪利又着晒火，睇怕卡爾祖翰莊臣有4隻手都未必頂得住！