英格蘭乘細追擊烏克蘭

魑魅魍魉

15/06/2011
文： 麥馬拿仁

在丹麥舉行的U21歐國盃今晚上演B組分組賽，兩支擂台躉英格蘭U21及西班牙U21分途出擊。英軍人腳一般，中場創造力不足，韋碧克同史杜列治一對箭頭埋門把握力亦唔強，對手烏克蘭U21實而不華，球員多來自基輔戴拿模同薩克達夾慣夾熟，力足同英軍周旋，就算輸都唔會大敗，拿仁捧細盤。（周四凌晨2時45分開賽）




「幼獅兵團」上仗鬥「狂牛兵團」被譽為本屆冠軍前哨戰，但英軍表現令人失望，剛以天價過檔利物浦嘅中場佐敦軒達臣演出靜到爆，整體創造力欠奉，僅靠丹尼路斯於左路發難，如果領隊皮雅斯再唔用魯迪維爾打正選，今場根本難以撕破對手防線。中場唔夠力，前鋒史杜列治及韋碧克只能憑個人之力「硬爆」對手，但烏克蘭球員硬淨機動性強，預料今仗英軍縱能取得主導，但威脅埋門都唔會多。


烏克蘭外圍賽守得


烏克蘭有隊長史堤巴蘭高因傷退隊，上仗雖然不敵捷克U21，但實際表現唔算曳。烏克蘭於外圍賽八戰僅失五球，有五場保持不失，首仗輸波後肯定踢得更謹慎，今場將採取穩守突擊踢法，面對得鋪牛力嘅「幼獅」，只要發揮水準絕對有得打，既然雙方都難攞到甜頭，捧細啱數。